Fici lu Signuri, 'ngnuornu, na Petra ccu tri Punti e la misi 'mmenzu ô mari, pirchì ognunu, passannu, s'arricurdassi la Divina Putenza. Sicilia la chiamarru e la chiamamu, 'sta Terra di paci, amuri e pararisu.

 

A colonnetta di Pippo Di Noto
	'Nzoccu servi s'arrizzetta 'capu o rintra a colonnetta; ppi cumirità mâ miettu a-ccapizzu ri lu liettu. Cu cci teni a pinnulidda; cu avi firi, a 'nzaiaredda ri nu Santu ccâ fiuredda. A cipudda ppi l'orariu, u libbrettu râ pinzioni, e na cruna ri Rrusariu ppi scurrìrisi i razioni. Ppi cu vivi, nu bicchieri misu a-ppurtat'ê manu, e cci'ppoia u cacciaturi	u fucili e u tascappanu. 'N-fazzulettu ppô catarru ppi ccu'è sempri arrifriddatu; ppi cu' fuma nu sicarru. Nu ritrattu ri surdatu... Puoi, ppi ccu' nun si tratteni, si cci metti nu rinali, pirchì a notti a tutti veni sempri noccu cos'ê fari. Cchi piccatu, se si 'etta, quannu è veccia, a colonnetta; miègghiu ca si fa gghiustari, ccuss' appuoi si po' mmusciari.

Iju sì, ca t'amu di Lina Riccobene Bancheri
	L'amuri mia sapi stirari... e 'gnutticari (comu linzola) stu silenziu tua. Mi calu - picureddra ntra n'ovili - e jettu la riti ni l'occhi tua comu 'ntra 'un mari. Ma pirchì la ta tristizza,	ca iju sula canusciu, nun po' ngagliari nni sta riti? Fallu ppi mia, vola! E pizzicali tu Li scintilli di stiddri ca luccicanu Comu luccica lu cori mia quannu ti vogghiu beni. Quannu t'amu.

Pueta, Cantaturi e Pincisanti		Fimmina e burritta tenila stritta
	Iu su' pueta, tu si' musicanti E tu pingiennu vai jurnalmenti, Ma semu tutti tri senza cuntanti, Tutti tri la passamu amaramenti; Pri cui un pruverbiu 'ntisi diri a tanti, ch'iu ccu duluri lu tegnu a la menti: Pueta, Cantaturi e Pingisanti tuttu le juornu campanu scuntenti.	Si voi chi fussi na donna perfetta, e fussi poi di tutti biniritta, 'ntra ddu statu, unni ad idda stari aspetta, tènici supra la to manu ritta; ma allocu di guadagnu farai detta si chistu nun farai, pirchì burritta, e donna - o maritata o fussi schetta -, sempri, quantu cchiù poi, tenila stritta.
Amicu ccu tutti e fidili ccu nuddu		Gatta prisciarola fa li figghi orvi
	Quannu mia nanna mi purtava ’ncoddu, Ed era giustu quantu un pidicuddu, Mi dicia sempri cc’un parrari moddu, Mai ccu l’amici t’a’ mettiri ’mbruddu: ’Nmenzu cci poi truvari spezza coddu, Pri cui ogni jornu a diriti m’affuddu, Si pruvari non voi qualchi tracoddu, Ccu tutti e fidili ccu nuddu.	Lu frittulusu si duna palora, E non la teni, lu so nomu oscura, E s’assimigghia a chiddu ca divora Tanti cosi ’ntra un puntu, e nenti appura: Cui fa cosi pusati mai s’accora, Cui non rifletti si nni penti ogn’ura, Si soli diri gatta priscialora Orvi li figghi fa pri la primura.
Cui manìja non pinija		A tavola si mangia senza affruntu
	Ddu cani ca di notti sempri abbaja, Abbaja pirchì mangia, e fa la spia; E un vinnituri ch’è un cuccuvaja Pirchì guadagna la roba vannija: Ma cui a nenti s’adatta, arrussu vaja, Ciancissi la so fami pr’ogni via, Pirchì ognunu davanti si lu ’mpaja Dicennu: cui manija non pinija.	Si a pranzu si n’vitatu, e tu fratantu Non mangi, pri russuri ’tra ddu puntu, Li stissi amici ca ti sunnu a cantu Dirannu: st’animali unn’è ca è juntu? Né d’un uomu educatu avrai lu vantu, Né ti purrai chiamari omu di cuntu, Pirchì aju ’ntisu diri, e ti lu cantu, Ch’a tavula si mangia senza affruntu.
Tratti da: Abate Santo Rapisarda, Proverbi Siciliani, Brancato Editore, Catania